Kadri Gërvalla u lind më 29.05.1966 në Lupç të Poshtëm, Komuna e Besianës. Shkollën fillore e kreu në vendlindje, ndërsa të mesmen, drejtimi ekonomik-komercial, si dhe Fakultetin Juridik e ka kryer në Prishtinë, kursin pasuniversitar për Marrëdhënie Ndërkombëtare e Diplomaci, e ka përfunduar në Akademinë Diplomatike Shqiptare, në Tiranë, dhe është pajisur me diplomën e ADSH-së.
Nga ajo kohë nuk ka pushuar së vepruari në aktivitetin e tij dhe ka pasur një varg angazhimesh të llojllojshme, duke qenë edhe në udhëheqje të shoqatave, të gazetave të ndryshme në gjuhën shqipe, që botoheshin nga mërgimtarët, Kosova dhe nga viset e tjera shqiptare. Në vitet 1990-1991 ishte kryetar dhe njëri, ndër themeluesit e shoqatës “BASHKIMI I RINISË”, që vepronte në Kosovë. Në atë kohë bashkëvepronte me Fatmir Humollin, Fehmi Pirevën, Enver Fazliun etj. Si student në Universitetin e Kosovës ka qenë bashkëpunëtor i gaztës së studentëve “BOTA E RE”.
Për shkaqe politike u largu nga Kosova në nëntor të vitit 1992 dhe u vendos në Austri. Ai pas vendosjes në Austri prej vitit 1992-2002 u mor me aktivitete dhe e kreu detyrën e kryetarit të shoqatës “FADIL VATA”.
Në vitin 1995 deri më 1997 ishte Sekretar i shoqatave shqiptare në Austri. Në fushën e gazetarisë ishte korrespodent i gazetës “ZËRI I KOSOVËS” prej 1992 deri më 2000, e cila botohej në Zvicër, ndërsa më 1996-1999 u bë redaktor i gazetës “ALBA”, Përgjegjës për informim dhe propagandim i fondit “VENDLINDJA THËRRET”, në Austri, i cili dha një kontribut të madh gjatë viteve 1997-1999 kur u zgjodh edhe nënkryetar, ndërsa po në këtë periudhë ishte edhe përgjegjës për informim dhe propagandim i këtij fondi..
Kadriu gjatë periudhës të vitit 1998/ 99, ka mbajtur mbi 200 tubime me mërgimtaret, duke i njoftuar dhe duke kontribuar për Luftën në logjistiken e saj. Ishte njëri ndër organizatorët e shumë protestave dhe demonstratave në diasporë, organizator dhe folës, në protestën e Strazburgut, kundër Dick Martit, organizator i rregullt i “FLAKËS SË JANARIT” në nderim të Heronjve, Jusuf e Bardhosh Gërvalla dhe Kadri Zeka.
Kadri Gërvalla nuk pushoi së reshturi duke punuar për mbrojtjen dhe internacionalizimin e çështjes së Kosovës. Në vitin 2016-2019, u anëtarësua dhe ishte anëtar i kryesisë së Nismës Socialdemokrate në Kosovë dhe kryetar i saj në Diasporë.
Kadri Gërvalla ishte pjesëtar i UÇK dhe i njihet statusi i Veteranit të Luftës. Më 28.11.2009 merr Mirënjohje nga Unioni Artistik i Kombit Shqiptar në Diasporë, për kontributin e dhënë në interes të çështjes kombëtare në Haidelberg në Gjermani. Po ashtu më 23.01.2011 merr Mirënjohje nga Shoqata “Iliria”, me motivacion, Kontribut në ruajtjen e vlerave të mirëfillta kombëtare.
Kadri Gërvalla përveç nënshtetësisë së Kosovës, ai posedon edhe nënshtetësinë Austriake dhe njeh gjuhën austriake dhe atë kroate. Ka punuar që nga viti 1992 deri më 2002 në Austri, pastaj nga viti 2002 deri më 2018 ishte i punësuar në Gjermani, menaxher i firmës “Geradel”, dhe nga vit 2018 deri në 2020 ishte Konsull i Republikës së Kosovës në Stuttgart.
Ka botuar këto vepra:
1. “Bregu i Diellit”, Tiranë, 1994;
2. “Të Lirë Paskëtaj”, Tiranë, 1998;
3. “Sytë nga Kosova”, Prishtinë, 2008;
4. “Roli i medias në bisedimet e Vjenës”, Prishtinë, 2010;
5. ”Fjalën se ndali…” Prishtinë, 2013;
6. “Zeqir Gërvalla, Poeti i Ribashkimit Kombëtar” 2017.
Kadri Gërvalla është i martuar me znj. Igballe Gërvalla-Juriste e Diplomuar dhe kanë dy djem: Flamurin dhe Jetlirin.
Jetojnë dhe veprojnë në Gjermani.
Ishte organizator i “TRIBUNËS PËR RIORGANIZIMIN E DIASPORËS”, Köln – Gjermani. Ai në vitet 2000/2002 ishte anëtar i kryesisë së PDK-së në Austri, pastaj në vitet 2006-2012 ishte anëtarë i PDK-së në Gjermani dhe zëdhënës i PDK-së gjatë kësaj periudhe.